Svanþór Ey

Fórum frá þessu fína hóteli í Saalfelden í Austurríki í mjög góðu veðri upp úr kl. 10 og héldum í áttina að Grossglockner Pass sem var vægast sagt skemmtileg leið, þurftum að greiða 26 EUR á mann fyrir að fá að aka yfir en það var hverrar krónu virði.

Stoppuðum á toppnum og fengum okkur hressingu og nutum útsýnisins í 2.430 m.y.s.

Stefnan var tekin á Faak Am See en þar er mikil hátíð bifhjólamanna, "Bike Week Europe 2018"

Leiðin lá svo áfram til Suðausturs og fljótlega tók veðrið að versna, þ.e.a.s. þrátt fyrir að hitastigið hafi aldrei farið niður fyrir 20°C þá byrjaði að rigna með þrumum og eldingum og þannig gekk þetta í nokkurn tíma.

Komumst þó allir heilir á áfangastað undir kvöld.

Erum á Hotel Sandwirth sem er um 40 km frá hátíðarsvæðinu sem er mjög stórt og þar koma saman allt að 125 þúsund bifhjólamenn á um 70 þúsund hjólum frá allri Evrópu... þetta er magnaður viðburður sem þyrfti sérstakan pistil til að lýsa og mun ég e.t.v. birta slíkan hérna síðar.

Í dag keyrðum við 257 km

Dagurinn í dag hófst á morgunmat eins og allir aðrir dagar í ferðinni.

Kvöddum tvo úr hópnum sem fóru saman til Munchen, en við hinir 7 lögðum af stað kl. 10:45 frá Selva Val Gardena í Tyrol.  Veðrið var frábært.

Byrjuðum á að fara í Gardena Pass og svo Campolongo Pass á leið okkar um Sella Ronda... þessi leið var alveg frábær.

Við fórum líka í Pordoi Pass, Fedaia Pass, Giau Pass (magnað), Falzarego Pass og Valparola Pass.

Ókum svo gamla þjóðveginn í gegnum Brenner skarð yfir til Austurríkis og er það 5. landið sem við heimsækjum í þessari ferð okkar.

Dagurinn var SVO skemmtilegur að orð fá því varla lýst.

Hitastigið var 12-25°C og alltaf þurrt.

Við fórum úr ca. 1.600 m.y.s. í Selva í 2.058 m.y.s. og aftur niður í 1.006 m.y.s. og svo strax aftur yfir 2.000 m og þannig gekk þetta í margar klukkustundir.

"Serpentínurnar" (hárnálarbeygjurnar) voru svo margar að þær hafa talið mörg hundruð í dag.

Eftir daginn lágu rúmlega 270 km

Erum núna komnir til Innsbruck á fínasta hótel í miðborginni.

Á morgun er ætlunin að fara í Arnarhreiðrið (Kehlsteinhaus) við landamæri Austurríkis og Þýskalands.... nánar um það annað kvöld.

Góðar stundir!

Við vöknuðum á Hotel San Lorenzo í Bormio á Ítalíu (sem var frábært hótel í frábærum bæ) í fínu veðri og lögðum af stað yfir Stelvio Pass í mjög góðum skilyrðum og allt byrjaði mjög vel fyrstu 39,5km en þá stoppuðum við á toppnum í 2757 m.y.s...... en þá gerðist það að einn úr hópnum tók ranga beygju og þá upphófst mikil atburðarrás sem ætlaði engan enda að taka.

Í framhaldinu fórum við  til Merano að borða og svo í Gampen pass og svo Mendel pass sem svo reyndust vera alveg frábærar leiðir.

Eftir daginn lágu svo aðeins 214 km.

Við fengum allt frá 3,5°C og upp í 25°C og efst í Stelvio var snjór yfir öllu nema veginum sjálfum, enda nýlega búið að ryðja veginn.

Þetta var skrýtinn dagur en endaði þó vel.

Nú sitjum við hér allir níu að fara yfir daginn.

Erum á Hótel Miravalle í Selva Val Gardena sem er mjög vinsælt skíðasvæði sem undirritaður og fleiri úr hópnum ætlum að heimsækja í febrúar n.k. til að fara á skíði og njóta vetrarskilyrðanna til hins ítrasta.

Þegar við vöknuðum í morgun var sól og blíða í þessum svissneska smábæ.

Lögðum snemma af stað í áttina að San Bernandino Pass sem var alveg frábær leið og með hæsta punkt í 2330 m.y.s.

Eftir það tók við Splugen Pass sem hefði líklega verið betri ef ekki hefði verið komin rigning en hæðin þar var mest 2115 m.y.s.

Svo var það Majola Pass sem var aðeins lægri eða 1815 m.y.s.

Allar leiðirnar voru afar hlykkjóttar og því mjög skemmtilegar leiðir til mótorhjólaaksturs.

Skilyrðin hefðu þó á stundum mátt vera betri.

Snæddum hádegismat á Ítalíu en áttum svo eftir að fara aftur til Sviss áður en við enduðum hér í Bormio á norður Ítalíu... þetta er nokkuð stór bær og hótelið sem við dveljum núna á er mjög gott.

Skelltum okkur á steikhús í nágrenninu og svo í SPA hér á hótelinu.

Allir eru sáttir við ferðina og allt hefur gengið vel.

Við höfðum áhyggjur af því fyrir ferðina að það gæti reynst erfitt að bóka gistingu fyrir 9 manns með allt niður í 2ja klst. fyrirvara, en sú hefur ekki orðið raunin.

Í dag ókum við 263 km og eins og áður hefur komið fram hefur hitastigið verið mjög breytilegt og við þurftum að takast á við talsverða rigningu á köflum en fengum glampandi sól þess á milli.